गाउँघरमा आजकल गरिब लाई भोक छैन सरकार!
निर्मूल भो जरैदेखि बिरामीलाई रोग छैन सरकार।।

अक्सिजनको अभावमा अस्पतालमा आमा बितिन्,
वाह! कस्तो सुबिधा त्यसैले मलाई शोक छैन सरकार।।

एमसीसी वरदान सावित भइसक्यो विकासका लागि,
हो,आजभोलि विरोध भएको कुनै चोक छैन सरकार।।

गाँस, बास, कपास शिक्षा स्वास्थ्य सुरक्षा सबै पुगिसक्यो,
मलाई अलि कम भयो भन्नु पर्ने कुनै थोक छैन सरकार ।।

खै के कारणले झन्डै दुईतिहाई बाट गठबन्धनमा झरिस,
बरू शुभकामना छ तँसङ्ग मेरो कुनै झोक छैन सरकार।।
लेखक :खड्ग बहादुर शाही खाँडाचक्र नगरपालिका -६ कालिकोट