कालिकोट —पश्चिम नेपालको पवित्र धार्मिक गन्तव्य बडिमालिका माताको दर्शनमा गइरहेका भक्तजनहरूको स्वास्थ्य सुरक्षाका लागि कालिकोटको रास्कोट नगरपालिकाले डाक्टरसहितको स्वास्थ्य टोली खटाएको छ।
बडिमालिका ४,२०० मिटर उचाइमा रहेको कठिन धार्मिक स्थल हो। यहाँ लेक लाग्ने, दम बढ्ने, वा आकस्मिक स्वास्थ्य समस्या देखिने सम्भावना उच्च हुने भएकाले रास्कोट नगरपालिकाले पहिलोपटक सक्रियता देखाएको हो।
नगर प्रमुख धर्मराज शाहीका अनुसार, नगर अस्पतालका डा. कमल प्रसाद बराल, जनकराज न्यौपाने, नागराज बराललगायत पाँच सदस्यीय टोली औषधिसहित आइतबार बडिमालिकातर्फ प्रस्थान गरेको हो। टोलीले तीर्थयात्रीहरूलाई यात्रा अवधिभर प्राथमिक उपचार सेवा उपलब्ध गराउनेछ।
प्रहरीका अनुसार रास्कोटको बाटो हुँदै हालसम्म १,५०० भन्दा बढी श्रद्धालु बडिमालिका पुगेका छन्। यसपालि कालिकोटबाट डोलीसहितको सरकारी टोली, पुजारी र जनप्रतिनिधिहरू पनि औपचारिक रूपमा गएका छन्। पहिले डोटी र जुम्लाबाट मात्रै यस्तो टोली जान्थ्यो।
धार्मिक परम्परा अनुसार, स्नान गर्ने त्रिवेणीधाम, बसोबास क्षेत्र र मुख्य पुजारी सबै कालिकोटबाटै जाने गर्छन्। स्थानीयहरू मनोकामना पूरा होस् भनेर धजा, अक्षता, फूलपाती, मूर्ति आदि सामग्री पठाउने परम्परा जोगाइरहेका छन्।
अब भक्तजनसँगै उपचारको भरोसा पनि जोडिएको छ—बडिमालिका यात्रा स्वास्थ्य सचेत यात्राको रूप लिँदैछ।
दियो खबर । १९ श्रावण २०८२, सोमबार १३:४६