-आमिर पाण्डे

(मातातीर्थ औँशी विशेष)बाल्यकालका ती निर्दोष दिनहरू सम्झँदा आज पनि मन कुनै अनन्त मिठासले भरिन्छ। सानो रहँदा जब कुनै इच्छा हुन्थ्यो, निःसंकोच आमासँग गुनासो गरिन्थ्यो — “आमा, मलाई यो चाहिन्छ।” आमा मुस्कुराउँदै भन्थिन् — “पक्कै, बाबु/छोरी।”
त्यो बेला लाग्थ्यो, आमा र उनको सम्पूर्ण सम्पत्ति हामीकै लागि हो। त्यो प्रेम, त्यो निस्वार्थता, त्यो समर्पण — केवल आमामै सम्भव छ भन्ने कुरा त्यतिखेर बुझिएको थिएन।

तर आज, जब आफ्नै पसिना बगाएर पैसा कमाउन थालेका छौँ, तब थाहा हुन्छ — कमाइसँगै आउने थकाइ, चिन्ता, असुरक्षा र जिम्मेवारीहरू पनि साथमा आउँछन्। आज हाम्रो कमाइ आफ्नै लागि मात्र होइन, भविष्यका डरहरू सम्हाल्नका लागि पनि हो। तब बल्ल बुझिन्छ — आमाले कहिल्यै थकान देखाइनन्, कहिल्यै गुनासो गरिनन्। केवल दिइरहिन्, माया र आश्रय।

आमा शब्द आफैँमा एक आकाश हो — नथाक्ने, नअर्काइने, नथाकेर निःस्वार्थ माया दिने।

आमा केवल जन्म दिने पात्र मात्र होइनन् — उनी जीवनलाई सही बाटोमा डोर्याउने मूर्त प्रेरणा हुन्।

आफ्नै दु:ख थामेर सन्तानलाई खुशी पार्न सक्ने शक्ति मात्र आमामा हुन्छ।

जसरी घामले आफैँ जल्दै संसारलाई उज्यालो दिन्छ, त्यसरी नै आमा आफैं सकिँदै हामीलाई जीवन दिन्छिन्।

आज मातातीर्थ औँशी — आमा सम्झिने विशेष दिन।

जसको जीवनमा आमा अझै हुनुहुन्छ, ती भाग्यमानी छन्। जसका लागि आमा अब सम्झनाको एउटा मधुर तस्बिर मात्र भएकी छन्, उनीहरूका आँखामा आज नयन रसाउँछन्। तर कुनै पनि अवस्थामा — आमा सधैँ हाम्रो भित्री बल र अस्तित्वको आधार बनिरहन्छिन्।

आजको दिन — आमाको निःस्वार्थ माया, असल चरित्र र अनन्त विश्वासप्रति कृतज्ञताको नमन हो।

संसारका सबै आमाहरूप्रति हार्दिक सम्मान!

आमाको सम्झनामा सबैलाई मातातीर्थ औँशीको शुभकामना।अन्त्यमा, एक सानो सन्देशः“पसिनाको कमाइले मात्र जीवन टिक्दैन, आमाको माया र आशीर्वादले मात्र जीवन फस्टाउँछ।”