काठमाडौँ। नेपालले मलेसियामा जारी एसीसी महिला प्रिमियर कप क्रिकेट प्रतियोगिताको समूहगत चरणको अन्तिम खेलमा मंगलबार माल्दिभ्समाथि कीर्तिमान जित हासिल गरेको छ।

नेपालले माल्दिभ्सलाई दुई सय १४ रनले हराएको हो । नेपाल तीनवटै खेल जित्दै समूह ‘डी’ को विजेताका रूपमा प्रतियोगिताको क्वार्टरफाइनलमा पुगेको छ ।

नेपालले माल्दिभ्सविरुद्धको खेलमा थुप्रै कीर्तिमान पनि बनाएको छ । नेपालले अन्तर्राष्ट्रिय महिला टी-२० क्रिकेटमा कुनै पनि टोलीविरुद्ध हासिल गरेको यो सबैभन्दा ठुलो रनअन्तरको जित हो ।

यसअघि नेपालले सन् २०२१ को नोभेम्बर १६ तारिखमा दोहामा खेलिएको खेलमा कतारलाई एक सय १९ रनले हराएको थियो । त्यो खेलमा नेपालले दिएको एक सय ४७ रनको लक्ष्य पछ्याएको कतार ११.५ ओभरमै केवल २७ रन बनाउँदै अलआउट भएको थियो ।

टस जिती पहिले ब्याटिङको निर्णय लिएको नेपालले निर्धारित २० ओभरमा चार विकेट गुमाएर दुई सय २७ रन बनाएको थियो । जवाफी ब्याटिङमा ओर्लिएको माल्दिभ्सले भने १३.५ ओभरमै अलआउट हुनुअघि १३ रनमात्र बनाउन सक्यो ।

जारी प्रतियोगितामा कुनै पनि टोलीले बनाएको यो सर्वाधिक रन हो । यसका अतिरिक्त नेपालले अन्तर्राष्ट्रिय महिला टी-२० क्रिकेटमा बनाएको पनि यो सर्वाधिक रन हो । यसअघि सन् २०२१ को नोभेम्बर १८ तारिखमा खेलिएको कतारविरुद्धको खेलमा नेपालले तीन विकेट गुमाएर एक सय ६४ रन बनाएको थियो ।

नेपालका लागि रुविना क्षेत्रीले शतक र पूजा महतोले अर्धशतक बनाए । चौथो नम्बरमा क्रिज समाल्न आएकी रुविनाले अविजित एक सय १८ रन बनाइन् । उनी अन्तर्राष्ट्रिय टी-२० महिला क्रिकेटमा शतक बनाउने पहिलो नेपाली खेलाडी पनि बनेकी छन् ।

रुविना अन्तर्राष्ट्रिय महिला टी-२० क्रिकेटको एउटै खेलमा सर्वाधिक रन बनाउने नेपाली खेलाडी पनि बनेकी छन् । यसअघि सन् २०२१ को नोभेम्बर १८ तारिखमा दोहामा खेलिएको कतारविरुद्धको खेलमा नेपालकी सीता रानामगरले अविजित ८२ रन बनाएकी थिइन् ।

रुविना जारी प्रतियोगिताको एउटै खेलमा सर्वाधिक रन बनाउने खेलाडी पनि बनेकी छन् । यसअघि ओमानविरुद्धको खेलमा यूएईकी एसा ओजाले अविजित एक सय १४ रन बनाएकी थिइन् ।

प्रारम्भदेखि नै आक्रामक रूपमा प्रस्तुत भएकी अनुभवी ब्याटर रुविनाले केवल ५९ बलको सामना गरी पाँच छक्का र १० चौका पनि हिर्काइन् । खेलमा उनको स्ट्राइक रेट दुई सय रह्यो । अन्तर्राष्ट्रिय महिला टी-२० क्रिकेटमा कुनै पनि नेपाली ब्याटरको यो सर्वोत्कृष्ट स्ट्राइक रेट पनि हो ।

यसका अतिरिक्त रुबिना अन्तर्राष्ट्रिय महिला टी-२० क्रिकेटमा सबैभन्दा बढी छक्का र चौका प्रहार गर्ने नेपाली खेलाडी पनि बनेकी छन् । उनले ११ छक्का र ७१ वटा चौका प्रहार गरेकी छन् । यो सूचिमा दोस्रो नम्बरमा रहेकी सीता रानामगरले सात छक्का र ६७ चौका हिर्काएकी छन् ।

माल्दिभ्सविरुद्ध केवल ६१ रनमा चौथो विकेट गुमाएको नेपालका लागि यी दुई ब्याटरले महत्त्वपूर्ण पाली खेले । रुविना र पूजाले अविजित एक सय ६६ रनको साझेदारी गरे । महिला अन्तर्राष्ट्रिय टी-२० क्रिकेटमा नेपालको यो सबैभन्दा ठुलो साझेदारी पनि हो ।

यसअघि सन् २०२१ को नोभेम्बर १६ तारिखमा दोहामा खेलिएको कतारविरुद्धको खेलमा नेपालका इन्दु बर्मा र सीता रानामगरले दोस्रो विकेटका लागि ८८ रनको साझेदारी गरेका थिए ।

पाँचौँ विकेटका लागि सबैभन्दा ठुलो साझेदारी भने सन् २०२२ को जुन १८ तारिखमा क्वालालम्पुरमा खेलिएको कुवेतविरुद्धको खेलमा इन्दु बर्मा र रुविना क्षेत्रीले गरेका थिए । त्यो खेलमा उनीहरूबिच पाँचौँ विकेटका लागि अविजित ६० रनको साझेदारी भएको थियो ।

मंगलबारको खेलमा छैटौँ नम्बरमा क्रिज समाल्न आएकी पूजाले पनि टोलीका लागि अविजित ५९ रनको योगदान गरिन् । पूजाले केवल ३६ बलको सामना गरी एक छक्का र पाँच चौका हिर्काइन् । अन्तर्राष्ट्रिय टी-२० क्रिकेटमा पूजाको यो पहिलो अर्धशतक हो ।

त्यसअघि ओपनर ब्याटर सीता रानामगरले १५ र कविता कुँवरले ११ रन बनाएकी थिइन् । कप्तान इन्दु बर्मा भने शून्य रनमै पेभेलियन फर्किइन् । डली भट्टले पनि टोलीको खातामा ६ रन थपिन् । नेपालले अतिरिक्त रूपमा पनि १६ रन पाएको थियो । माल्दिभ्सकी बलर सम्मा अलीले तीन विकेट लिइन् । नबा नसिमले पनि एक विकेट हात पारिन् ।

जवाफी ब्याटिङमा ओर्लिएको माल्दिभ्सलाई सस्तोमा समेट्ने क्रममा नेपाली बलर अस्मिना कर्माचार्यले चार विकेट लिइन् । पूजा महतो र रुविना क्षेत्रीले पनि तीन-तीन विकेट हात पारेका थिए ।

समूह ‘डी’ मा रहेको नेपालले तीनवटै खेलमा जित हात पार्‍यो । नेपालले समूहगत चरणको आफ्नो पहिलो खेलमा हङ्कङलाई आठ विकेटले हराएको थियो । नेपालले दोस्रो खेलमा भुटानलाई पनि आठ विकेटले नै पराजित गरेको थियो ।

नेपालको समूहबाट हङ्कङ पनि समूह उपविजेताका रूपमा क्वार्टरफाइनलमा पुग्यो । हङ्कङले मंगलबार नै खेलिएको समूहगत चरणको आफ्नो अन्तिम खेलमा भुटानलाई ७२ रनले हरायो । दुई जित हात पारेको हङ्कङको चार अंक छ ।

एसियाली क्रिकेट काउन्सिल (एसीसी) ले महिला प्रिमियर कप पहिलो पटक आयोजना गरेको हो । यो प्रतियोगिताको फाइनलमा पुग्ने दुई टोलीले आगामी जुलाईमा आयोजना हुने महिला टी-२० एसिया कपमा सहभागिता जनाउन पाउने छ । एसिया कपमा भारत, पाकिस्तान, बंगलादेश, श्रीलंका र छनोट चरणबाट आउने दुई टोली सहभागी हुनेछन् ।

फेब्रुअरी १८ तारिखसम्म सञ्चालन हुने महिला प्रिमियर कपमा कुल १६ वटा राष्ट्रको सहभागिता रहेको छ । प्रतियोगिताको समूह ‘सी’ मा बहराइन, इन्डोनेसिया, आयोजक मलेसिया र कतार रहेका छन् । समूह ‘बी’ मा चीन, जापान, ओमान र संयुक्त अरब इमिरेट्स (यूएई) परेका छन् । समूह ‘ए’ मा भने कुवेत, म्यानमार, सिंगापुर र थाइल्यान्ड रहेका छन् ।

समूहगत चरणको खेलपछि प्रत्येक समूहबाट दुई-दुई टोली प्रतियोगिताको क्वार्टरफाइनलमा प्रवेश गर्नेछन् । चारवटै क्वार्टरफाइनल खेल फेब्रुअरी १४ तारिखमा खेलिने छ । सेमिफाइनल खेल फेब्रुअरी १६ र फाइनल खेल १८ तारिखमा हुनेछ ।