काठमाडौँ। दक्षिण अफ्रिकामा जारी आईसीसी यू–१९ विश्वकप २०२४ मा आज नेपालले बंगलादेशसँग खेल्दैछ। खेल नेपाली समय अनुसार दिउँसो १ः४५ मा माङ्गाउगं ओभलमा सुरु हुनेछ।

नेपाल सुपर सिक्स खेल्नु अघि नै सेमिफाइनल दौडबाट बाहिर भइसकेको छ । त्यसैले नेपालको लक्ष्य विना दबाब उत्कृष्ट खेल्दै बंगलादेशलाई दुई दशकपछि स्तब्ध पार्ने सोच हुनेछ। उता बंगलादेशलाई भने सुपर सिक्सको अंक गणीतिय सम्भावना कायमै राख्न विशाल जित आवश्यक पर्दछ ।

नेपाल सुपर सिक्समा २ खेलमा अंक विहीन हुँदै पाँचौं स्थानमा छ । बंगलादेश २ खेलमा २ अंकका साथ तेस्रो स्थानमा छ। समान ६–६ अंक भएपनि नेटरनरेटको कारण भारत शीर्ष र पाकिस्तान दोस्रो स्थानमा छन् ।

नेपाल समूह डी मा पहिलो खेलमा न्युजिल्यान्डसँग ६४ रन र पाकिस्तानसँग ५ विकेटले पराजित भएको थियो । अफगानिस्तानलाई भने १ विकेटले हराउँदै सुपर सिक्समा पुगेको थियो । बंगलादेश भारत ८४ रनले पराजित हुँदा आयरल्यान्डलाई ६ विकेट र अमेरिकालाई १२१ रनले हराउँदै सुपर सिक्स खेलेको थियो ।

अफगानिस्तानलाई हराउन नेपालका आकाश चन्दले ५ विकेट र कप्तान देव खनालले ५८ रनको अर्धशतकीय इनिङ खेलेका थिए । अर्जुन कुमाल र गुलशन झा पनि नेपालका प्रमुख हतियार हुन् । अर्जुनले पहिलो खेलमा न्युजिल्यान्डविरुद्ध ९० रन बनाएका थिए । गुलशन भने तीनै खेलमा सस्तैमा आउट भएका छन् । सिनियर टोलीबाट खेलिसकेका गुलशनलाई ठूलो इनिङ खेल्न आवश्यक देखिन्छ ।

नेपालका तीव्र गतिका बलर दुर्गेश गुप्ता घाइते छन् । तिलक भण्डारीको हातमा टाँका लगाइएको थियो । तिलक खेल्न नसकेको अवस्थामा नेपालले दीपक बोहरालाई मौका दिने सम्भावना रहन्छ । नेपालले विशाल विक्रम केसीलाई आज आकाश त्रिपाठीको स्थानमा मौका दिनसक्छ । आकाश र गुलशनले तीव्र गतिको बलिङ आक्रामण सम्हाल्नुपर्ने हुन्छ ।

स्पिनर सुवास भण्डारीले बलिङसँगै तीनै खेलमा अन्त्यमा राम्रो ब्याटिङ पनि गरेका छन् । शीर्षक्रमका ब्याटर अर्जुन, विपिन रावल र आकाश त्रिपाठीले राम्रो सुरुवात दिन आवश्यक छ । भारतविरुद्ध ५ विकेट लिएका बंगलोदशका तीव्र गतिका बलर मरुफ मृधाको बलमा भने नेपाल सम्हाल्लिनु पर्ने हुन्छ ।

अरिफुल इस्लाम बंगलादेशका प्रमुख ब्याटर हुन् । अमेरिकाविरुद्ध यस विश्वकपमा शतकीय इनिङ खेलेका थिए । गत डिसेम्बरमा भारतलाई एसिया कपमा हराउन उनले ९४ रनको इनिङ खेलेका थिए । उनलाई समयमै आउट गर्न सके नेपाल खेलमा हाबी हुनसक्छ ।

नेपाल र बंगलादेशबीच यू–१९ विश्वकपमा हालसम्म दुई खेल भएका छन् । नेपालले २००२ को विश्वकपमा बंगलादेशलाई २३ रनले हराएको थियो । २०१६ को यू १९ विश्वकप क्वाटरफाइनल भने नेपाल ६ विकेटले पराजित हुँदै बाहिरिएको थियो ।