काठमाडौं। पोखरामा जारी केपी ओली कप क्रिकेट प्रतियोगिताको सेमिफाइनल समीकरण पूरा भएको छ । मंगलबारको खेलपछि बागमती प्रदेश, एपीएफ क्लब, मधेश प्रदेश र त्रिभुवन आर्मी क्लब अन्तिम चारमा पुगेका छन् ।

समूह ए बाट बागमती, समूह बी बाट एपीएफ, समूह सी बाट मधेश र समूह डीबाट त्रिभुवन आर्मी क्लब सेमिफाइनलमा पुगेका हुन् ।बागमतीले समूह चरणमा कर्णाली प्रदेशलाई ९० रन र मदन भण्डारी स्पोर्टस एकेडेमी (रातो) लाई १०९ ले पराजित गरेको थियो । समूह चरणको दुबै खेल जितेको मधेशले चार अंक जोडेको थियो ।

समूह बीमा एक खेल जितेको एपीएफ क्लब नेट रनरेटमा अगाडि रहँदै सेमिफाइनल पुगेको हो । एपीएफ पहिलो खेलमा घरेलु टिम गण्डकीसँग ४ विकेटले पराजित भएको थियो भने दोस्रो खेलमा लुम्बिनीलाई ८४ रनले पराजित गरेको थियो । त्यस्तै लुम्बिनीले गण्डकीलाई पराजित गर्दा नेट रनरेटमा एपीएफ अगाडि रह्यो ।

समुह सीमा भने बलियो टिम नेपाल पुलिस क्लब समूह चरणबाटै बाहिरिन पुग्यो । मंगलबार पुलिस सुदूरपश्चिमसँग ४ विकेटले पराजित हुँदा नेट रनरेटका आधारमा मधेश सेमिफाइनलमा पुगेको हो ।

समूह डीबाट त्रिभुवन आर्मी क्लब समूह चरणको दुवै खेल जित्दै सेमिफाइनल पुगेको छ । आर्मीले पहिलो खेलमा मदन भण्डारी स्पोर्टस एकेडेमी (निलो)लाई ११० रनले र दोस्रोमा कोशी प्रदेशलाई ३९ रनले पराजित गरेको हो । १४ मंसिरमा हुने सेमिफाइनलमा बागमतीले त्रिभुवन आर्मीसँग र एपीएफले मधेशसँग खेल्नेछन् । फाइनल खेल मंसिर १५ गते हुनेछ ।