कालिकोट– तिला कर्णाली बहुमुखी क्याम्पस, ताडीमा भोलि (चैत १८) हुने स्वतन्त्र विद्यार्थी युनियन (स्ववियु) निर्वाचनमा सभापति पदका लागि तीन उम्मेदवारबीच प्रतिस्पर्धा हुने भएको छ। मुख्य रूपमा दलहरूबाट समर्थित दुई उम्मेदवार र एक स्वतन्त्र उम्मेदवारबीच चुनावी प्रतिस्पर्धा तीव्र बनेको छ।

सभापतिका लागि अनेरास्ववियुबाट दिपा शाही, अखिल (क्रान्तिकारी)बाट हिक्मत सिंह र स्वतन्त्र रूपमा सर्मिला शाही मैदानमा छन्। नेकपा एमाले निकट अनेरास्ववियुकी उम्मेदवार दिपा शाहीलाई नेपाली कांग्रेस सम्बद्ध नेपाल विद्यार्थी संघले समर्थन गरेको छ। त्यस्तै, माओवादी केन्द्र निकट अखिल (क्रान्तिकारी) उम्मेदवार हिक्मत सिंहलाई एकीकृत समाजवादी निकट अखिल (समाजवादी), विप्लव माओवादी निकट अखिल समाजवादी, राष्ट्रिय प्रजातन्त्र पार्टी निकट राप्रवि संघ र नेपाल मजदूर किसान पार्टी निकट नेपाल विद्यार्थी संघ (क्रान्तिकारी)को साथ रहेको छ। स्वतन्त्र उम्मेदवार सर्मिला शाही भने कुनै पनि दल वा संगठनसँग सहकार्य नगरी स्वतन्त्र रूपमा प्रतिस्पर्धामा उत्रिएकी छिन्।

स्ववियु निर्वाचन विद्यार्थीहरूका लागि मात्र नभई राजनीतिक दलहरूका लागि पनि चासोको विषय बनेको छ। अनेरास्ववियुका लागि नेकपा एमाले र नेविसंघका लागि नेपाली कांग्रेसका नेताहरू प्रत्यक्ष रूपमा विद्यार्थीलाई भेटेर वा फोनमार्फत भोट मागिरहेका छन्। त्यस्तै, माओवादी केन्द्र, एकीकृत समाजवादी, विप्लव माओवादी र मजदूर किसान पार्टीका नेताहरू पनि आफ्ना उम्मेदवारको पक्षमा सक्रिय छन्।