कालिकोट– महावै गाउँपालिकामा सम्पन्न दुईदिने विशेष स्वास्थ्य शिविरमा ६६९ स्थानीयले सेवा प्राप्त गरेका छन्।
स्वास्थ्य सेवा कार्यालय कालिकोट, महावै गाउँपालिकाको स्वास्थ्य शाखा, महावै आधारभूत अस्पताल, ओडा फाउन्डेसन र प्रदिया फाउन्डेसनको संयुक्त आयोजनामा चैत्र २१ र २२ गते शिविर सञ्चालन गरिएको थियो।
शिविरमा हाडजोर्नी तथा नसा रोग, स्त्रीरोग र गर्भवती जाँच, बालरोग, सामान्य शल्यक्रिया, परिवार नियोजन, निदानात्मक परीक्षणसहित विविध स्वास्थ्य सेवा प्रदान गरिएको थियो।
गाउँमै शिविर सञ्चालन हुँदा वृद्धवृद्धा, बालबालिका र बयस्कलाई उपचारमा सहजता भएको गाउँपालिका अध्यक्ष खेम बहादुर सिंहले बताए।
“शिविर गाउँमै गर्दा नागरिकलाई सदरमुकाम धाउनुपरेन, यसले सबैलाई सहज र समयमै उपचार गर्न सहयोग पुग्यो,” अध्यक्ष सिंहले भने।
दियो खबर । २१ चैत्र २०८१, शुक्रबार २०:४०