कालिकोट/मध्यपश्चिम विश्वविद्यालय अन्तर्गत तिला कर्णाली बहुमुखी क्याम्पस, कालिकोटमा स्ववियु निर्वाचनका लागि साझा प्यानलले मनोनयन दर्ता गरेको छ।

अखिल (क्रान्तिकारी)का हिक्मत सिंहको नेतृत्वमा दर्ता गरिएको प्यानलमा सचिव पदमा अनेरास्ववियूका उमेश शाही, कोषाध्यक्ष पदमा राप्रविसंघकी मीना शाही, र सदस्य पदमा राप्रविसंघका गोगन बहादुर शाही तथा अखिल (समाजवादी)का मनकल गोराल रहेका छन्।

माओवादी केन्द्रका महावै इन्चार्ज दुर्गा काफ्लेले उक्त प्यानल सत्तारूढ गठबन्धनको साझा प्रयासमा बनेको जानकारी दिनुभयो। कांग्रेस निकट नेविसंघ र एमाले निकट अनेरास्ववियू समेत साझा प्यानल सामेल भएपछि सत्ता बाहिर रहेका विद्यार्थी संगठनहरू पनि एकताबद्ध भएर प्रतिस्पर्धामा उत्रन बाध्य भएको विद्यार्थी नेताहरूले बताएका छन्।

कालिकोट सदरमुकाम मान्म ताडीस्थित क्याम्पसको स्ववियु निर्वाचनले स्थानीय राजनीति र संगठनको बलियो उपस्थिति देखाउने भएकाले चुनावलाई विशेष चासोका साथ हेरिएको छ।

साझा प्यानलले आफूहरूलाई अत्यधिक बहुमतले विजयी गराउन सम्पूर्ण विद्यार्थीहरूमा हार्दिक अपिल गरेको छ।