कर्णालीमा खासै ठूलो वर्षा भएको छैन । तर, सामान्य वर्षाले पनि लोकमार्गका विभिन्न ठाउँका खहरेखोलाले सडक अवरुद्ध हुँदै आएको छ । कालीकोट खण्डमा पहिरो बगिरहेकाले दैनिक यातायात अवरुद्ध हुने गरेको छ ।
सुनारखोलाले सबैभन्दा बढी दुःख यसपालि पनि दिइरहेको छ । सुनारखोलामा दैनिक एक्साभेटरले गाडी तान्ने काम गरिरहेको जिल्ला ट्राफिक कार्यालय कालीकोटले जनाएको छ । प्रमुख जिल्ला अधिकारी रामहरि शर्माले कालीकोटको पहिरो सफाका लागि वर्षात्को समयमा एक्साभेटर तयारी अवस्थामा राख्न सम्बद्ध निकायलाई निर्देशन दिनुभएको छ । अहिले एक्साभेटरले पहिरो पन्छाउने र गाडीलाई तान्ने काम गरिरहेको छ । यसअघि सो सडकखण्डमा यातायात अवरुद्ध हुँदा स्थानीयले ज्यादै दुःख खेप्दै आएका थिए । नगरपालिकाले पनि अवरुद्ध सडक खुलाउनेतर्फ चासो दिँदै आएको छ । यद्यपि महालेखाको प्रतिवेदनमा राष्ट्रियस्तरका सडक खुलाउन एक्साभेटर प्रयोग गरेको भन्दै नगरपालिकाले भुक्तानी गरेको बजेटमा बेरुजु देखाएपछि पालिकाले खासै चासो दिएको छैन ।