राष्ट्रपतिमा रामचन्द्र पौडेल विजयी

काठमाडौं /   राष्ट्रपतिको  निर्वाचनको मतपरिणामअनुसार राष्ट्रपतिमा रामचन्द्र पौडेल विजयी भएका छन् ।

नयाँ बानेश्वरस्थित संसद् भवनमा मतदान भएको थियो । निर्वाचन आयोगका अनुसार रामचन्द्रले ३३ हजार ८०२ मतभार पाए भने अर्का उम्मेदवार सुवासचन्द्र नेम्वाङले १५ हजार ५१८ मतभार पाए । पौडेलले २१४ संघीय सांसद र ३५२ प्रदेश सांसदको मत पाए । यस्तै नेम्वाङले ९८ संघीय सांसद र १६२ प्रदेश सांसदको मत पाए ।

बिहीबार बिहान १० बजेदेखि सुरु भएको मतदान दिउँसो ३ बजे सम्पन्न भएको हो । राष्ट्रपतिका लागि कुल ८८१ मध्ये ८३१ मत खसेको छ । संघीय सांसदतर्फ ३१३ मत खसेको छ । संघीय संसदका कुल ३३१ मध्ये १८ मत खसेन । यसमा राप्रपाका १४, भारतमा उपचाररत कांग्रेसका सांसद चन्द्र भण्डारी र फरार सांसद लक्ष्मी महतो कोइरीसमेत १६ जनाको मत खसेन भने बाँकी दुई सांसद पनि अनुपस्थित देखिए ।

यसैगरी प्रदेशसभातर्फ ५५० मध्ये ५१८ सदस्यले मतदान गरेका छन् । ३२ जनाको मत नखसेकामा राप्रपाका २८ छन् भने थप चारजना मतदानमा अनुपस्थित भएको देखिन्छ ।

राष्ट्रियसभाका ५९ र प्रतिनिधिसभाका २७५ सांसद गरी संघीय संसद्‌मा ३३४ कुल सदस्य छन् । तीमध्ये एकजना निलम्बित, एकको निधन भएको, एकजना पदमुक्तसमेत गरी तीनजना घटाउँदा कुल मतदाता संख्या ३३१ थियो ।