काठमाडौँ। त्रिकोणात्मक टी–२० अन्तर्राष्ट्रिय क्रिकेट शृङ्खलाको उपाधि नेदरल्यान्ड्सले जित्यो।
डच टोलीले मंगलबार कीर्तिपुरस्थित अन्तर्राष्ट्रिय क्रिकेट मैदानमा खेलिएको फाइनल खेलमा नेपाललाई चार विकेटले हराउँदै उपाधि चुमेको हो।
टस जिती पहिले ब्याटिङको निर्णय लिएको नेपालले निर्धारित २० ओभरमा आठ विकेट गुमाएर एक सय ८४ रन बनाएको थियो । जवाफी ब्याटिङमा ओर्लिएको नेदरल्यान्ड्सले १९.३ ओभरमा ६ विकेट गुमाएर एक सय ८९ रन बनाउँदै विजय लक्ष्य पार गर्यो ।
शृङ्खलामा तेस्रो टोलीका रूपमा नामिबियाको सहभागिता रहेको थियो । नामिबिया लिग चरणको खेलबाटै घर फर्किएको थियो । फाइनल खेलपछि विजयी टोली र खेलाडीलाई पूर्वप्रधानमन्त्री एवं नेकपा एमालेका अध्यक्ष केपी शर्मा ओली, पूर्वअर्थमन्त्री विष्णु पौडेल, वरिष्ठ कलाकार हरिवंश आचार्यलगायतले पुरस्कार वितरण गरे ।
आगामी जुनमा अमेरिका र वेस्ट इन्डिजमा आयोजना हुने आईसीसी टी–२० विश्वकपको तयारीका क्रममा यो शृङ्खला खेलिएको हो । यो शृङ्खलामा सहभागी तीनवटै राष्ट्र टी–२० विश्वकपको नवौँ संस्करणमा छनोट भएका छन् ।
मंगलबार सम्पन्न त्रिकोणात्मक शृङ्खलामा एउटा विश्व कीर्तिमान पनि बन्यो । कीर्तिपुरस्थित अन्तर्राष्ट्रिय क्रिकेट मैदानमा सर्वाधिक रनको कीर्तिमान पनि यही शृङ्खलामा बन्यो । यो शृङ्खलामा उत्कृष्ट प्रदर्शन गर्ने टोली र खेलाडीको विषयमा यहाँ चर्चा गरिएको छ ।
- नेदरल्यान्ड्सका लेभिट म्यान अफ दी म्याच
त्रिकोणात्मक टी–२० अन्तर्राष्ट्रिय क्रिकेट शृङ्खलाको फाइनल खेलमा नेदरल्यान्ड्सका ओपनर ब्याट्सम्यान माइकल लेभिट म्यान अफ दी म्याच घोषित भए । डच टोलीलाई उपाधि चुमाउन फाइनल खेलमा लेभिटले उत्कृष्ट प्रदर्शन गरेका थिए ।
ओपनर ब्याट्सम्यान लेभिटले ५४ रनको योगदान गरेका थिए । उनले केवल २९ बलको सामना गरी तीन छक्का र ६ चौका हिर्काएका थिए । त्यसअघि उनले दुई विकेट पनि लिएका थिए ।
लेभिटले नेपालका ओपनर ब्याट्सम्यान आसिफ शेखलाई ४७ र नेपाली टोलीका कप्तान रोहित पौडेललाई २५ रनमा आउट गराएका थिए । यसका अतिरिक्त उनले एउटा क्याच पनि लिएका थिए ।
- लेभिट सर्वाधिक रन बनाउने ब्याट्सम्यान
जारी त्रिकोणात्मक टी–२० अन्तर्राष्ट्रिय शृङ्खलामा नेदरल्यान्ड्सका माइकल लेभिट सर्वाधिक रन बनाउने ब्याट्सम्यान बने । उनले शृङ्खलाको चार पालीमा ६१.७५ को औसतले कुल दुई सय ४७ रन बनाए ।
यस क्रममा उनले एक शतक र दुई अर्धशतक पनि हिर्काएका थिए । प्रतियोगिता अवधिभरमा उनले लेभिटले १६ छक्का र २३ वटा चौका पनि प्रहार गरेका थिए ।
सर्वाधिक रन बनाउने ब्याट्सम्यानको सूचिमा नेपालका कप्तान रोहित पौडेल दोस्रो स्थानमा रहे । उनले पाँच पालीमा ३४.६ को औसतले कुल एक सय ७३ रन बनाए ।
रोहितले एउटा अर्धशतक पनि प्रहार गरे । प्रतियोगिता अवधिभरमा कप्तान रोहितले सात छक्का र १७ वटा चौका पनि प्रहार गरेका थिए ।
- कुशल मल्ल सर्वाधिक विकेट लिने बलर
नेपालका कुशल मल्ल र नामिबियाका रुबेन ट्रम्पलम्यान सर्वाधिक विकेट लिने बलर बने । कुशल मल्लले चार पाली खेल्दै सात विकेट लिए । कुलशले फाइनल खेलमा मात्र चार विकेट लिएका थिए ।
यसका अतिरिक्त जारी शृङ्खलामा उनले एउटा अर्धशतक पनि बनाएका थिए । सर्वाधिक रन बनाउने ब्याट्सम्यानको सूचिमा पनि उनी छैटौँ स्थानमा रहे । उनले कुल एक सय २६ रन बनाएका थिए ।
यसैगरी नामिबियाका ट्रम्पलम्यानले तीन पालीमा सात विकेट लिएका थिए । शृङ्खलामा उनको उत्कृष्ट प्रदर्शन २९ रन खर्चिएर चार विकेट रह्यो ।
नेपालका करण केसी, नेदरल्यान्ड्सका भिभियन किङ्गमा र नेदरल्यान्ड्सकै टिम भान डर गुटेनले पनि शृङ्खला अवधिभरमा ६–६ विकेट लिए ।
- नेदरल्यान्ड्स सर्वाधिक योगफल बनाउने टोली
त्रिकोणात्मक शृङ्खलामा नेदरल्यान्ड्स सर्वाधिक योगफल बनाउने टोली बन्यो । नेदरल्यान्ड्सले लिग चरणको नामिबियाविरुद्धको खेलमा पाँच विकेट गुमाएर दुई सय ४७ रन बनाएको थियो ।
सर्वाधिक योगफल बनाउने टोलीको सूचिमा नामिबिया दोस्रो स्थानमा रह्यो । नामिबियाले लिग चरणको खेलमा नेपालविरुद्ध चार विकेट विकेट गुमाएर दुई सय ६ रन बनाएको थियो ।
- स्कट एडवार्डस सफल विकेटकिपर
शृङ्खलामा नेदरल्यान्ड्सका स्कट एडवार्डस सबैभन्दा सफल विकेटकिपर बने । उनले प्रतियोगितामा विभिन्न टोलीका ६ जना ब्याट्सम्यानलाई पेभेलियन फर्काउन महत्त्वपूर्ण भूमिका निर्वाह गरे । उनले पाँच ब्याट्सम्यानको क्याच लिएका थिए भने एक ब्याट्सम्यानलाई स्टम्पिङ गरेका थिए ।
सफल विकेटकिपरको सूचिमा नेपालका आसिफ शेख दोस्रो स्थानमा रहे । उनले प्रतियोगितामा विभिन्न टोलीका चार ब्याट्सम्यानलाई आउट गराउन महत्त्वपूर्ण भूमिका निर्वाह गरे । उनले दुई ब्याट्सम्यानको क्याच लिए भने दुई ब्याट्सम्यानलाई स्टम्पिङ गरे ।
- फ्राइलिंक सर्वाधिक क्याच लिने फिल्डर
यसैगरी जारी शृङ्खलामा नामिबियाका जन निकोलस फ्राइलिंक सबैभन्दा बढी क्याच लिने फिल्डर बने । उनले प्रतियोगिता अवधिभरमा कुल चारवटा क्याच लिएका थिए । उनले एउटै खेलमा तीनवटा क्याच लिएका थिए ।
सर्वाधिक क्याच लिने फिल्डरको सूचिमा नामिबियाकै जन निकोल लफ्टी एटन दोस्रो स्थानमा रहे । उनले प्रतियोगिता अवधिभरमा तीनवटा क्याच लिएका थिए । एटनले एउटै खेलमा दुईवटा क्याच लिएका थिए ।
यसका अतिरिक्त नामिबियाकै जोहानेश जोनाथन स्मित, नेपालका दीपेन्द्रसिंह ऐरी र नेपालका गुलसन झाले पनि शृङ्खलामा तीन–तीनवटा क्याच लिएका थिए ।
- सबैभन्दा ठुलो साझेदारी
जारी त्रिकोणात्मक टी–२० अन्तर्राष्ट्रिय शृङ्खलामा सबैभन्दा ठुलो साझेदारी गर्ने कीर्तिमान डच टोलीका ब्याट्सम्यानको नाममा रह्यो । नेदरल्यान्ड्सका ब्याट्सम्यानले उक्त कीर्तिमान नामिबियाविरुद्धको खेलमा बनाएका थिए ।
उक्त खेलमा नेदरल्यान्ड्सका माइकल लेभिट र साइब्रान्डले दोस्रो विकेटका लागि एक सय ९३ रनको साझेदारी गरेका थिए । ओपनर ब्याट्सम्यान लेभिटले एक सय ३५ रन बनाएका थिए ।
जारी शृङ्खलाको एउटै पालीमा कुनै पनि ब्याट्सम्यानले बनाएको पनि यो उच्च रन हो । तेस्रो नम्बरमा क्रिज समाल्न आएका साइब्रान्डले पनि उक्त खेलमा ७५ रन जोडेका थिए ।
दोस्रो ठुलो साझेदारी नामिबियाका ब्याट्सम्यानले गरेका थिए । नामिबियाका ब्याट्सम्यानले उक्त साझेदारी नेपालविरुद्धको खेलमा गरेका थिए । उक्त खेलमा नामिबियाका मलान क्रुगर र जन निकोल लफ्टी एटनले चौथो विकेटका लागि एक सय ३५ रनको साझेदारी गरेका थिए ।
नामिबियाका ओपनर ब्याट्सम्यान क्रुगरले ४८ बलमा दुई छक्का र ६ चौकाको मद्दतले ५९ रन बनाएका थिए । पाँचौँ नम्बरका ब्याट्सम्यान एटनले केवल ३६ बलको सामना गरी आठ छक्का र ११ चौकाको मद्दतले एक सय एक रन बनाएका थिए ।
- कीर्तिपुर मैदानमा सर्वाधिक रनको कीर्तिमान
यही शृङ्खलामा कीर्तिपुरस्थित अन्तर्राष्ट्रिय क्रिकेट मैदानमा टी–२० अन्तर्राष्ट्रिय क्रिकेटमा कीर्तिमानी रन पनि बनेको थियो । शृङ्खलाको लिग चरणको खेलमा नेदरल्यान्ड्सले नामिबियाविरुद्ध पाँच विकेट गुमाएर दुई सय ४७ रन बनाएको थियो ।
कीर्तिपुर मैदानमा कुनै पनि टोलीले टी–२० अन्तर्राष्ट्रिय क्रिकेटमा बनाएको यो सर्वाधिक रन थियो । नेदरल्यान्ड्सले टस जितेर पहिले ब्याटिङ गर्दै उक्त रन बनाएको थियो । नेदरल्यान्ड्सले उक्त खेलमा नेपालको कीर्तिमान तोडेको थियो ।
त्यसअघि कीर्तिपुर मैदानमा सन् २०२१ को अप्रिल २४ मा खेलिएको नेदरल्यान्ड्सविरुद्धको टी–२० अन्तर्राष्ट्रिय खेलमा नेपालले निर्धारित ओभरमा तीन विकेट गुमाएर दुई सय ३८ रन बनाएको थियो । नेदरल्यान्ड्सले त्यही कीर्तिमान तोडेको थियो ।
कीर्तिपुर क्रिकेटमा मैदानमा बनेको तेस्रो ठुलो स्कोर पनि नेपालको नाममा छ । नेपालले सन् २०१९ को डिसेम्बर ५ तारिखमा सम्पन्न टी–२० क्रिकेटमा भुटानविरुद्ध तीन विकेट गुमाएर दुई सय ३६ रन बनाएको थियो ।
- सर्वाधिक छिटो शतकको विश्व कीर्तिमान
जारी शृङ्खलामा एउटा विश्व कीर्तिमान पनि बन्यो । उक्त कीर्तिमान नामिबियाका ब्याट्सम्यान जन निकोल लफ्टी ईटनले बनाएका हुन् । उनले नेपालविरुद्धको खेलमा त्यो कीर्तिमान बनाएका थिए ।
पाँचौँ नम्बरमा क्रिज समाल्न आएका ईटनले टी–२० अन्तर्राष्ट्रिय क्रिकेटमा सबैभन्दा छिटो शतक प्रहार गर्ने खेलाडीको कीर्तिमान आफ्नो नाममा पारेका थिए । उनी नेपाली ब्याट्सम्यान कुशल मल्लको कीर्तिमान तोड्दै सबैभन्दा छिटो शतक पुरा गर्ने खेलाडी बनेका हुन् ।
ईटनले केवल ३३ बलमा शतक पुरा गरेका थिए । कुशल मल्लले भने सन् २०२३ को सेप्टेम्बर २७ तारिखमा खेलिएको मंगोलियाविरुद्धको खेलमा ३४ बलमा शतक बनाएका थिए । चीनमा सम्पन्न एसियाली खेलकुदअन्तर्गत खेलिएको उक्त खेलमा कुशल मल्लले केवल ५० बलमा अविजित एक सय ३७ रन बनाएका थिए । साभारः रातोपाटी
दियो खबर । २२ फाल्गुन २०८०, मंगलवार २०:१०